Bilaketak

Bilaketak Sarreretan

Emaitza

Bilaketak Itzulpenetan

Webgunearen sarrera-orrian bertan egin daiteke oinarrizko lehen bilaketa bat. Horretarako, erdian dagoen laukian idatzi bilatu nahi duzun hitza, eta intro tekla sakatu edo, bestela, idazten hastearekin batera hedatzen den zerrendatik nahi duzun hitza hautatu. Emaitza webgunearen kontsulta-interfazean bistaratuko da.

Bilaketa-laukiaren gainean ageri diren hizkuntza-bikoteek bilaketa zein hiztegitan egin daitekeen adierazten dute. Aktibo dagoen hiztegia azpimarraturik dago. Aukera lehenetsia eu-es da; beraz, besterik adierazi ezean, lehen bilaketa eu-es /es-eu hiztegian egingo da, hau da, euskarazko nahiz gaztelaniazko hitzak bilatuko dira. eu-en hizkuntza-bikotea hautatzen baduzu, bilaketa eu-en/en-eu hiztegian egingo da, eta beste hainbeste eu-fr bikotearekin.

Zure bilaketa edozein delarik ere, emaitza bigarren pantailan bistaratuko da. Sarrera-orrian bilaketa egin gabe kontsulta-interfazera zuzenean joan nahi baduzu, laukiaren azpian den Bilaketa aurreratua aukera sakatu.

Zure bilaketa zein hizkuntzatan egin nahi duzun zehazteko, bilagaiaren laukiaren eskuineko zerrendako aukera bat sakatu behar duzu (euskara, gaztelania, frantsesa edo ingelesa). Euskara hautatzen baduzu, hiru hiztegietako emaitzak ikus ditzakezu. Hain zuzen ere, lauki horren azpian dauden hiru laukiak helburu-hizkuntzak dira, eta zuk markatutako hizkuntzetan egingo da bilaketa. Kontsultaren emaitzan hizkuntza horietako baten edukia bistaratu nahi ez baduzu, laukia desaktibatu besterik ez duzu egin behar. Hizkuntzen zerrendan erdaretako bat hautatuta, ikusiko duzu eskuineko helburu-hizkuntza bakarra euskara dela.

Ondoren, bilagaiaren laukian, aurkitu nahi duzun hitza, terminoa, esapidea edo, bestela, karaktere zein karaktere-segida idatzi. % irudiaren ondoko aukera aktibatuta izanik, halako hitzez, karakterez edo karaktere-multzoz hasitako sarrera eta azpisarrera guztiak bistaratuko dira (azpisarrerak sarrera baten barnean antolatzen diren unitateak dira, eta, nagusiki, hitz anitzekoak dira, hala nola hitz-elkarteak, hitz anitzeko terminoak, esapideak, gramatika-egiturak...). Adibidez, azpirekin hasten diren sarrerak eta azpisarrerak aurkitzeko, aski da bilagaiaren laukian azpi idatzi, eta Bilatu botoia edo Intro tekla sakatzea, betiere % irudiaren ondoko aukera aktibatuta dagoela. Horrelakorik nahi ez baduzu, hau da, kontsulta-sistemak zure bilagaiaren amaieran automatikoki % eranstea nahi ez baduzu, % irudiaren ondoko aukera desaktibatu egin behar duzu. Bestetik, halako amaiera duten hitzak bilatu nahi badituzu, % irudiaren ondoko aukera desaktibatu, bilagaiaren hasieran % idatzi, eta, jarraian, nahi duzun amaiera. Esaterako, bilagaiaren laukian %pen idatzita, -pen amaiera duten sarrerak eta azpisarrerak bistaratuko dira.

Bilaketa-baldintzak betetzen dituzten sarrerez edo azpisarrerez osatutako zerrenda ezkerraldean agertzen da, Hiztegi-unitateak goiburuaren azpian. Zerrenda alfabetoaren arabera ordenaturik dago (hitz anitzeko unitateetan, hitz-elkarteen marra ez da kontuan hartzen ordenatzeko; zuriunea bai, ordea).

Zerrenda horretako unitate batean klik eginez, hari dagokion edukia erdialdean agertzen da; emaitzak lehen aldiz bistaratzean, zerrendako lehenaren edukia hedatzen da.

Sarrera-hitza goian dago, eta haren ondoan zenbait ikur agertzen dira:

• Hitzaren ahoskera entzun, Aholab-Elhuyarren ahots-sintetizagailuaren bidez

• Hitzaren ahoskera entzun daiteke, Forvo bidez

• Hitza partekatzeko hainbat aukera:

  • Hitza Twitter bidez partekatu

  • Hitza Facebook bidez partekatu

• Hitzari buruzko iruzkina bidali

Sarrera baten artikulua adieratan antolatuta dago.

Bestalde, Ordainak delako atala ere egituratuta dago. Hitz batek adiera bakoitzean dituen ordainak edo itzulpenak, haien arteko baliokidetza-maila irizpidetzat hartuta, kide-multzotan antolatuta daude, puntu eta komaz bereizita. Kide-multzoei beharrezko informazioa gehitu zaie, erabilera-oharren, eremu geografikoaren marken eta marka semantikoen bidez. Adibide batzuk:

Ordain edo itzulpen bat hiztegiaren beste ataleko sarrera edo azpisarrera denean, letra lodiz nabarmenduta dago, eta dagokion sarrerara edo azpisarrerara zuzenean joateko esteka du.

Adieren ondoren, sarrera nagusiari dagozkion azpisarrerak zerrendatzen dira. Horietako edozeinetan klik eginez gero, hari buruzko informazioa bistaratzen da.

Azpisarreren informaziora sarrera nagusitik iritsi gaitezke; baina ez da bide bakarra. Hain zuzen ere, hiztegi-kontsultaren emaitzetan (Hiztegi-unitateak delakoan) sarrerak eta azpisarrerak bistaratzen dira. Beraz, azpisarrera batera zuzenean irits gaitezke zerrenda horretatik. Kontsultatu nahi dugun azpisarreran sakatzen dugunean, dagozkion edukiak soilik bistaratzen dira behealdean, ez sarrera osoa. Dena den, hiztegian azpisarrera hori zein sarreratan dagoen adierazten da goialdean, eta bertara joateko esteka dago.

Sarreren zein azpisarreren ordainetan Ik. xxx agertzeak adierazten du delako xxx dela euskara estandarrerako onartutako grafia. h. xxx ageri bada, berriz, delako xxx grafia hobetsia dela adierazten da. Hainbat espezie-izenetan, forma estandarra zein den bidaltze-ohar baten bidez adierazi da (➥) euskara-atalean. Gaztelania-atalean, berriz, tekn. (teknizismoa) laburdura erabili da euskarazko forma estandarraren ondoan.

Bilaketa-modu honen bidez, jakin dezakezu bilagaiaren laukian sartzen duzun hitza zein sarreraren itzulpen edo ordain gisa eman den hiztegian. Zure bilaketa zein hizkuntzatan egin nahi duzun zehaztu behar duzu lehenik, bilagaiaren laukiaren eskuineko zerrendako hizkuntza bat hautatuz (euskara, gaztelania, frantsesa edo ingelesa). Esaterako, euskarazko koaderno gaztelaniazko zein hitzen ordaintzat eman den jakiteko, Itzulpenetan aukera sakatu, eta bilagaiaren hizkuntzarako Euskara hautatu. Bilaketa egindakoan, gaztelaniazko sarrera-zerrenda bat izango duzu ezkerraldean, Hiztegi-unitateak goiburuaren azpian.

Azkenik, sarreren eta ordainen informazioaren ondoren, zutabearen behealdean, Elhuyarren web-corpuseko adibideak ere ikus ditzakegu, «Ikusi adibide gehiago» sakatuta.