Maiz irakurtzen ditugu honelako esaldiak:
Zentzu horretan, EH Bilduk bere adierarik zabalenean beteko du Gasteizko Parlamentuko autogobernu ponentzian estatus politiko berria eraikitzen joateko EAJrekin eta Podemosekin lotua daukan akordioa.
Aurten finalaurrekoetatik kantatu dut eta, zentzu horretan, inozentzia ongi galduta daukat.
Zentzu horretan, beharrezkoa da arazoaren erroa seinalatzea.
Gure herri honetan gure kirolak dauzkagu, eta zentzu horretan kirol arduraduna izatea izugarria da.
Zentzu horretan, nabarmendu nahi dugu garrantzia handia duela...
Gaztelaniazko “en ese sentido” edo frantsesezko “en ce sens” lokailuen kalko kaskar gisa sartu zaigu “zentzu horretan”, eta barra-barra ageri da testu orokorretan, administraziokoetan zein dibulgaziokoetan, bai eta ahoz ere, ikus-entzunezko saio askotarikoetan.
Euskara Batuaren Eskuliburuak jasoa du hori, eta honela azaltzen du “zentzu” sarreran:
Kontuan hartzea komeni da, beraz, eta “zentzu horretan” desegokiaren ordez hori dela eta, horren haritik, ildo horretan, orobat, -i dagokionez… baliatzea, betiere testuinguruari erreparatuta; beste batzuetan, berriz, testuinguruaren arabera, gaztelaniazko “en ese sentido”ren ordain egokiena ezer ez jartzea da, ez baitugu ahaztu behar ez ditugula hitzak itzultzen, ezta esaldiak ere, hitz edo esaldi horiek diotena baizik. Ez da guk esana, Miguel Sáenz gaztelaniazko itzultzaile handiak baizik, liburutxo mehe bezain gihartsu honetan: Traducción. Dieciocho conferencias magistrales y dos discursos de circunstancias.