Hauteskundeen inguruko lexikoa
Laster hauteskundeak izango dira, eta dagoeneko ari zaizkigu horren inguruko berriak leku guztietatik iristen. Gaurkoan, hauteskundeetan erabiltzen ditugun zenbait hitzen erabilera egokia zein den argituko dugu.
- boto (*botu):
Boto zuria eta boto baliogabeak igo egin dira hauteskunde hauetan.
- boz terminoak bi adiera ditu:
- ‘boto’ adierazten duena:
Boz-emaileen % 80 baino gehiago joan da bozkatzera.
Boza emateko eskubidea.
- ‘bozketa’, ‘botazio’, ‘bozka’ edo ‘hauteskunde’ adierazten duena. Beti pluralean erabiltzen da:
Abstentzioak gora egin du Hego Euskal Herriko bozetan.
- bozka: ‘bozketa’ adierazten du, baina, ‘boto’ hitzaren adiera berarekin erabiltzen da zenbaitetan. Horregatik, honelako esaldi okerrak ikusten dira:
EH Bilduk inoiz baino *bozka gehiago lortu ditu. è e. boto gehiago
Nahiz eta eskuin-muturraren kontrako *bozka nagusitu den, Le Penen alderdiaren gorakada nabarmena da Ipar Euskal Herrian. è e. kontrako botoa
- bozkatu aditza NOR-NORK formakoa da, baina, ez du NOR osagarririk hartzen. Beraz, *Herriaren ia erdiak PP bozkatu du gisako esaldiak ez dira zuzenak. Horrelakoetan, -(r)en alde edota -(r)en kontra gehitzea eskatzen dute:
Herriaren ia erdiak PPren alde bozkatu du.
- boto-asmo (*boto-intentzio):
Espainiako Gorteetarako Hauteskundeetarako astebete falta denean, EH Bildu litzateke lehen indarra EAEn (boto-asmo zuzenaren % 20,9), EAJri aurrea hartuta (% 18).
- boto zuri (*boto txuri):
51 boto zuri eta 31 baliogabe zenbatu dira.
- boto-paper (*papeleta):
Arrasateko zenbait etxebizitzatara ez dira iritsi koalizio subiranistaren zenbait boto-paper.
- bozkaleku, hautesleku (*kolegio elektoral, *hauteskunde-kolegio):
Gure ustez, hauteslekuan egindako inkestak dira sinesgarrienak.
- hautagai-zerrendan egon, hautagai-zerrenda osatu; aurkeztu (*hautagai-zerrendan joan):
Ez da berriro aurkeztuko hauteskundeetan.
Ez da berriro egongo hauteskunde-zerrendan.
*Duela lau urteko hauteskundeetan PSE-EEren hautagai-zerrendan joan zen.
- hautesleria, hautesleak (*hauteslego):
Ohikoena izaten da hautesleriaren % 3-5ek bozkatzea posta bidez.
- hautetsontzi (*hautestontzi, *hautesontzi):
20:00etan puntuan itxi dituzte hautetsontziak Galizian.
- jarduneko (*funtzioetako):
Ekitaldian egon dira Eusko Jaurlaritzako jarduneko sailburu gehienak.
- kanpainaurre (*aurrekanpaina):
Kanpaina hasteko 10 egun falta direnean, alderdiak kanpainaurrean murgilduta daude.
- mitin (*meeting):
Bost lagun zauritu dira Baionan, FNren mitin baten osteko istiluetan.
- parte-hartze handia/txikia (*parte-hartze altua/baxua):
9:00etan irekiko dira hauteslekuak, eta parte-hartze handia espero da.
- zerrendaburu (*zerrenda-buru):
Pernando Barrena Europako hauteskundeetako zerrendaburu izatea proposatuko die oinarriei EH Bilduk.